മകളുടെ കൊലപാതകം പിതാവിന് ജീവപര്യന്തം
എറണാകുളം : പത്തുവയസുകാരി മകളെ കൊലപ്പെടുത്തിയ കേസിൽ അച്ഛൻ സനുമോഹന് ജീവപര്യന്തം ശിക്ഷ വിധിച്ച് കോടതി.
കുട്ടികള്‍ക്കെതിരായ കുറ്റകൃത്യങ്ങള്‍ പരിഗണിക്കുന്ന എറണാകുളത്തെ പ്രത്യേക കോടതി ജഡ്ജി കെ.സോമനാണ് വിധി പ്രസ്താവിച്ചത്. പത്തുവയസുകാരി വൈഗയെ കൊലപ്പെടുത്തിയ കേസിൽ അച്ഛൻ സനുമോഹൻ കുറ്റക്കാരനെന്ന് വിധിച്ച കോടതി പ്രതിക്കെതിരെ ചുമത്തിയ എല്ലാ കുറ്റവും തെളിഞ്ഞതായി വിധിന്യായതിൽ പറഞ്ഞു. കൊലപാതകം, കൊലപ്പെടുത്തുക എന്ന ഉദ്ദേശ്യത്തോടെ മദ്യം നല്‍കല്‍, തെളിവ് നശിപ്പിക്കല്‍, ജുവൈനല്‍ ജസ്റ്റിസ് ആക്ട് പ്രകാരമുള്ള വിവിധ വകുപ്പുകള്‍ പ്രതിക്കെതിരെ തെളിഞ്ഞിട്ടുണ്ട്.
അതേസമയം അപൂർവങ്ങളിൽ അപൂർവമായ കേസ് ആയി പരിഗണിക്കണമെന്നും വധശിക്ഷ നല്‍കണമെന്നുമാണ് പ്രോസിക്യൂഷൻ വാദിച്ചത്. ആദ്യമായല്ല ഇത്തരം കേസെന്നും അപൂർവങ്ങളിൽ അപൂർവമായി പരിഗണിക്കരുതെന്നും പ്രതിഭാഗം വാദിച്ചു .