‘മാമി’ യെ കണ്ടുപിടിക്കാൻ ക്രൈംബ്രാഞ്ച്

കോഴിക്കോട്:  റിയൽ എസ്റ്റേറ്റ് ബിസിനസ്  നടത്തിവന്നിരുന്ന മുഹമ്മദ് ആട്ടൂർ (മാമി) യുടെ തിരോധാനവുമായി ബന്ധപ്പെട്ട് പി വി അൻവർ എംഎൽഎ ഉയർത്തിയ ആരോപണങ്ങൾ അന്വേഷിക്കുന്നതിനായി ക്രൈംബ്രാഞ്ചിന്റെ പ്രത്യേക അന്വേഷണസംഘത്തിന് രൂപം നൽകി.
ക്രൈംബ്രാഞ്ച് കോഴിക്കോട് റേഞ്ച് ഐജി പി പ്രകാശിന്റെ മേൽനോട്ടത്തിലാണ് സംഘം പ്രവർത്തിക്കുക.
ക്രൈംബ്രാഞ്ച് എഡിജിപി എച്ച് വെങ്കടേഷ് ആണ് പ്രത്യേക അന്വേഷണ സംഘത്തിന് രൂപം നൽകി ഉത്തരവ് പുറപ്പെടുവിച്ചത്.
തിരോധാനവുമായി ബന്ധപ്പെട്ട് നടക്കാവ് പോലീസ് സ്റ്റേഷനിൽ രജിസ്റ്റർ ചെയ്ത കേസ് ക്രൈംബ്രാഞ്ച് സംഘത്തിന് കൈമാറി.
കോഴിക്കോട് ക്രൈംബ്രാഞ്ച് ഡിവൈഎസ്പി യു.പ്രേമൻ ആണ് അന്വേഷണ ഉദ്യോഗസ്ഥൻ. കോഴിക്കോട്,വയനാട് ക്രൈംബ്രാഞ്ച് യൂണിറ്റുകളിലെ ഡിറ്റക്ടീവ് ഇൻസ്പെക്ടർമാരായ സി.എസ് ഷാരോൺ, ആർ.രതീഷ് കുമാർ  പി.അഭിലാഷ്,സിബി തോമസ് എന്നിവരെക്കൂടാതെ കോഴിക്കോട് ക്രൈംബ്രാഞ്ച് എസ്.പി യും സംഘത്തിലുണ്ട്.