നാഷണൽ യൂണിറ്റി ദിനം: ലഹരിക്കെതിരെ ദൗത്യവുമായി ഇരവിപുരം പോലീസും എസ്.പി.സി കേഡറ്റുകളും

കൊല്ലം: ഇന്ത്യയുടെ ഉരുക്ക് മനുഷ്യൻ എന്നറിയപ്പെടുന്ന സർദാർ വല്ലഭായ് പട്ടേലിന്റെ ജന്മദിനമായ നാഷണൽ യൂണിറ്റി ദിനത്തിൽ (ദേശീയ ഐക്യ ദിനം) ലഹരി വിപത്തിനെതിരെ സന്ദേശം നൽകി ഇരവിപുരം പോലീസും സ്റ്റുഡന്റ് പോലീസ് കേഡറ്റുകളും (എസ്.പി.സി.) ചേർന്ന് കൂട്ടയോട്ടം സംഘടിപ്പിച്ചു.
​ഇരവിപുരം സ്റ്റേഷൻ ഹൗസ് ഓഫീസർ (എസ്.എച്ച്.ഒ) രാജീവ് കൂട്ടയോട്ടം ഫ്ലാഗ് ഓഫ് ചെയ്തു. തുടർന്ന് എസ്.എച്ച്.ഒ ഉൾപ്പെടെയുള്ള പോലീസ് ഉദ്യോഗസ്ഥരും വിദ്യാർത്ഥികൾക്കൊപ്പം കൂട്ടയോട്ടത്തിൽ പങ്കെടുത്തു.
​ഇരവിപുരം പോലീസ് സ്റ്റേഷനിൽ നിന്ന് ആരംഭിച്ച കൂട്ടയോട്ടം സമാപിച്ചത് വാളത്തുങ്കൽ ഗേൾസ് ഹയർ സെക്കൻഡറി സ്കൂളിലാണ്. വാളത്തുങ്കൽ ഗേൾസ് എച്ച്.എസ്.എസ്., വെള്ളമണൽ സ്കൂൾ, മയ്യനാട് എച്ച്.എസ്.എസ്. എന്നിവിടങ്ങളിലെ എസ്.പി.സി. കേഡറ്റുകൾ ദൗത്യത്തിൽ പങ്കാളികളായി.
​സമാപനത്തോടനുബന്ധിച്ച്, ലഹരിവിരുദ്ധ സന്ദേശം ഇരവിപുരം പോലീസ് സ്റ്റേഷനിലെ ഗ്രേഡ് എസ്.ഐ. ഷാജി അവതരിപ്പിച്ചു. സ്റ്റേഷനിലെ പോലീസ് ഉദ്യോഗസ്ഥർ, എസ്.പി.സി. ഉദ്യോഗസ്ഥർ, അധ്യാപകർ എന്നിവർ പരിപാടിയിൽ പങ്കെടുത്തു. ലഹരിയുടെ ദൂഷ്യഫലങ്ങളെക്കുറിച്ച് വിദ്യാർത്ഥികളിൽ അവബോധം സൃഷ്ടിക്കുക എന്ന ലക്ഷ്യത്തോടെയാണ് കൂട്ടയോട്ടം സംഘടിപ്പിച്ചത്.