കൊല്ലം തങ്കശ്ശേരി തീപിടിത്തം: മൂന്ന് വീടുകൾ കത്തിനശിച്ചു; തീ പടർന്നത് വിളക്കിൽ നിന്ന്, സിലിണ്ടർ പൊട്ടിത്തെറിച്ചു

കൊല്ലം: തങ്കശ്ശേരി ആൽത്തറ തൈക്കുളങ്ങര ഭാഗത്ത് ഇന്നലെ രാത്രി 8 മണിയോടെയുണ്ടായ തീപിടിത്തത്തിൽ അടുത്തടുത്തുള്ള മുരുകൻ, അനി, കൃഷ്ണൻകുട്ടി എന്നിവരുടെ മൂന്ന് ഷീറ്റ് മേഞ്ഞ വീടുകൾ പൂർണമായും കത്തിനശിച്ചു. സമീപത്തെ വീട്ടിൽ കത്തിച്ചു വച്ചിരുന്ന വിളക്കിൽ നിന്നാണ് തീ പടർന്നതെന്നാണ് പ്രാഥമിക നിഗമനം. മുരുകൻ്റെ വീട്ടിലാണ് ആദ്യം തീപിടിച്ചത്. സംഭവം നടക്കുമ്പോൾ വീട്ടുകാർ പുറത്തായിരുന്നെങ്കിലും, ഈ വീട്ടിലെ പാചകവാതക സിലിണ്ടർ പൊട്ടിത്തെറിച്ചത് തീ സമീപത്തെ വീടുകളിലേക്ക് അതിവേഗം പടരാൻ കാരണമായി. ഭിന്നശേഷിക്കാരനായ കൃഷ്ണൻകുട്ടിയെ ബന്ധുക്കളും നാട്ടുകാരും ചേർന്നാണ് വീട്ടിൽ നിന്ന് പുറത്തെത്തിച്ചത്. ചാമക്കട, കടപ്പാക്കട എന്നിവിടങ്ങളിൽ നിന്ന് 5 യൂണിറ്റ് അഗ്നിരക്ഷാ സേന എത്തി അരമണിക്കൂറിനുള്ളിൽ തീ അണച്ചെങ്കിലും ഗാർഹികോപകരണങ്ങളും വിലപ്പെട്ട രേഖകളും കത്തിച്ചാമ്പലായി.