വെർച്വൽ അറസ്റ്റ്: വയോധികന് രക്ഷകനായി സൈബർ പോലീസ്; പത്തു ലക്ഷം രൂപയുടെ തട്ടിപ്പ് ഒഴിവാക്കി
തിരുവനന്തപുരം: കള്ളപ്പണ ഇടപാടിൽ കുടുക്കിയെന്ന് ഭീഷണിപ്പെടുത്തി റിട്ടയേർഡ് ഉദ്യോഗസ്ഥനിൽ നിന്ന് പത്തു ലക്ഷം രൂപ തട്ടിയെടുക്കാനുള്ള ‘വെർച്വൽ അറസ്റ്റ്’ ശ്രമം തിരുവനന്തപുരം സിറ്റി സൈബർ പോലീസ് പരാജയപ്പെടുത്തി. തട്ടിപ്പുകാരുടെ നിരന്തര ഭീഷണിയിൽ മനംനൊന്ത് ജീവനൊടുക്കാൻ വരെ ആലോചിച്ച ശ്രീവരാഹം സ്വദേശിയായ ഉദ്യോഗസ്ഥനാണ് പോലീസിന്റെയും ബാങ്ക് അധികൃതരുടെയും ഇടപെടലിലൂടെ രക്ഷപെട്ടത്.
ഡിസംബർ 17-നാണ് തട്ടിപ്പുകാർ ഇദ്ദേഹത്തെ ആദ്യമായി വാട്സ്ആപ്പിലൂടെ ബന്ധപ്പെടുന്നത്. മുംബൈ പോലീസ് കേസ് രജിസ്റ്റർ ചെയ്തിട്ടുണ്ടെന്നും കള്ളപ്പണ ഇടപാടിലും ദേശവിരുദ്ധ പ്രവർത്തനങ്ങളിലും പങ്കുണ്ടെന്നും ആരോപിച്ചായിരുന്നു സന്ദേശം. 24-ാം തീയതി മുതൽ പ്രതികൾ ഇദ്ദേഹത്തെ നിരന്തരം വിളിക്കാൻ തുടങ്ങി. കേസിൽ നാലുപേരെ അറസ്റ്റ് ചെയ്തെന്നും അഞ്ചാമനായ ഇദ്ദേഹത്തെ ‘വെർച്വൽ അറസ്റ്റിൽ’ ആക്കിയിരിക്കുകയാണെന്നും വിശ്വസിപ്പിച്ചു. ഇദ്ദേഹത്തിന്റെ ചിത്രം മറ്റു പ്രതികളുടെ ചിത്രങ്ങൾക്കൊപ്പം ചേർത്ത് എഡിറ്റ് ചെയ്ത് അയച്ചുകൊടുത്തതോടെ വയോധികൻ ഭയചകിതനായി.
അറസ്റ്റ് ഒഴിവാക്കാൻ സുപ്രീം കോടതി ഉത്തരവുണ്ടെന്നും ഇതിനായി റിസർവ് ബാങ്കിലേക്ക് ഒന്നരക്കോടി രൂപ പിഴയടയ്ക്കണമെന്നുമാണ് തട്ടിപ്പുകാർ ആവശ്യപ്പെട്ടത്. ഇതിനായി വ്യാജ ആർ.ബി.ഐ ലെറ്റർ ഹെഡും പ്രതികൾ ഇദ്ദേഹത്തിന് അയച്ചുകൊടുത്തു. പണമടയ്ക്കാൻ ഉത്തർപ്രദേശിലെ മൊറാദാബാദിലുള്ള ഒരു അക്കൗണ്ട് നമ്പറും നൽകി. തന്റെ പക്കൽ പത്തു ലക്ഷം രൂപയുടെ സ്ഥിരനിക്ഷേപം മാത്രമേയുള്ളൂ എന്ന് വയോധികൻ അറിയിച്ചതോടെ, തുക തൽക്കാലം അക്കൗണ്ടിലേക്ക് മാറ്റാൻ തട്ടിപ്പുകാർ നിർദ്ദേശിക്കുകയായിരുന്നു.
സ്ഥിരനിക്ഷേപം പിൻവലിക്കാൻ ബാങ്കിലെത്തിയ ഉദ്യോഗസ്ഥന്റെ പെരുമാറ്റത്തിൽ അസ്വാഭാവികത തോന്നിയ മാനേജർ കാര്യം തിരക്കി. വീട് പണിക്കാണെന്ന് ഇദ്ദേഹം മറുപടി നൽകിയെങ്കിലും പണം അയക്കേണ്ടത് അന്യസംസ്ഥാനത്തെ അക്കൗണ്ടിലേക്കാണെന്ന് കണ്ടതോടെ മാനേജർക്ക് സംശയം തോന്നി. തുടർന്ന് ഇടപാട് അടുത്ത ദിവസത്തേക്ക് മാറ്റിവെച്ച ശേഷം ബാങ്ക് അധികൃതർ ഉടൻ തന്നെ തിരുവനന്തപുരം സിറ്റി സൈബർ പോലീസ് സ്റ്റേഷനിൽ വിവരം അറിയിച്ചു.
പോലീസിന്റെ കൃത്യസമയത്തെ ഇടപെടൽ
വിവരമറിഞ്ഞെത്തിയ സൈബർ പോലീസ് ഉദ്യോഗസ്ഥർ വയോധികനെ കാര്യങ്ങൾ വിശദമായി പറഞ്ഞ് ബോധ്യപ്പെടുത്തി. ഇത് രാജ്യവ്യാപകമായി നടക്കുന്ന സൈബർ തട്ടിപ്പിന്റെ ഭാഗമാണെന്ന് ഉറപ്പായതോടെ പോലീസ് കൂടുതൽ അന്വേഷണം ആരംഭിച്ചു. പോലീസിന്റെ സമയോചിതമായ ഇടപെടൽ വലിയൊരു സാമ്പത്തിക നഷ്ടത്തിൽ നിന്നും മാനസിക തകർച്ചയിൽ നിന്നുമാണ് റിട്ടയേർഡ് ഉദ്യോഗസ്ഥനെ രക്ഷിച്ചത്.
മുന്നറിയിപ്പ്: സൈബർ ക്രിമിനലുകൾ ആരെയും വീഡിയോ കോളിലൂടെ അറസ്റ്റ് ചെയ്യില്ലെന്നും, പണം ആവശ്യപ്പെട്ട് കോളുകൾ വന്നാൽ ഉടൻ തന്നെ 1930 എന്ന നമ്പറിൽ സൈബർ ഹെൽപ്പ് ലൈനിൽ ബന്ധപ്പെടണമെന്നും പോലീസ് അറിയിച്ചു.