കൈക്കൂലി വാങ്ങുന്നതിനിടെ ചേർത്തല എം.വി.ഐ വിജിലൻസ് പിടിയിൽ; പിടികൂടിയത് വീട്ടിൽ വെച്ച്

ആലപ്പുഴ: വാഹനങ്ങളുടെ റീ-ടെസ്റ്റ് നടത്തുന്നതിനും ഡ്രൈവിങ് ടെസ്റ്റ് പാസ്സാക്കുന്നതിനും കൈക്കൂലി വാങ്ങിയ മോട്ടോർ വാഹന വകുപ്പ് ഇൻസ്പെക്ടർ വിജിലൻസ് വലയിലായി. ചേർത്തല എം.വി.ഐ കെ.ജി. ബിജുവിനെയാണ് ആലപ്പുഴ വിജിലൻസ് സംഘം അറസ്റ്റ് ചെയ്തത്. ഡ്രൈവിങ് സ്കൂൾ ഉടമയിൽ നിന്ന് 5,600 രൂപ കൈക്കൂലി വാങ്ങുന്നതിനിടെ ഇയാളുടെ വീട്ടിൽ വെച്ചായിരുന്നു അറസ്റ്റ്.
​
പരാതികൾ വ്യാപകം
​
വാഹനങ്ങളുടെ റീ-ടെസ്റ്റിനായി എത്തുന്നവരെ ബിജു നിരന്തരം ബുദ്ധിമുട്ടിച്ചിരുന്നതായി പരാതിയുണ്ട്. ഏജന്റുമാരോ ഡ്രൈവിങ് സ്കൂൾ ഉടമകളോ തലേദിവസം തന്നെ പണം എത്തിച്ചു നൽകിയാൽ മാത്രമേ ടെസ്റ്റ് നടപടികൾ സുഗമമായി നടക്കുമായിരുന്നുള്ളൂ. പണം നൽകാത്തവരുടെ ടെസ്റ്റ് നിസ്സാര കാരണങ്ങൾ പറഞ്ഞ് വൈകിപ്പിക്കുകയോ തടസ്സപ്പെടുത്തുകയോ ചെയ്യുന്നത് ഇയാളുടെ പതിവായിരുന്നു.
​
രഹസ്യ നീക്കത്തിലൂടെ അറസ്റ്റ്
​
ഏജന്റുമാരിൽ നിന്നും ഡ്രൈവിങ് സ്കൂൾ ഉടമകളിൽ നിന്നും വലിയ തുക ഇയാൾ കമ്മീഷനായി ആവശ്യപ്പെടുന്നതായി വിജിലൻസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിൽ നടത്തിയ നീക്കത്തിലാണ് പണം വാങ്ങുന്നതിനിടെ ഉദ്യോഗസ്ഥൻ കുടുങ്ങിയത്. പണം നൽകാൻ നിർബന്ധിതരായ പലരും ഇയാളുടെ അഴിമതിക്കെതിരെ രംഗത്തെത്തിയിരുന്നു.
അഴിമതിയിലൂടെ സമ്പാദിച്ച കൂടുതൽ പണം ഇയാളുടെ പക്കലുണ്ടോ എന്നറിയാൻ വീട്ടിലും ഓഫീസിലും വിജിലൻസ് പരിശോധന തുടരുകയാണ്.