ഉപയോഗിക്കാത്ത ജിമെയില്‍ അക്കൗണ്ടുകള്‍ ഡിസംബറോടെ അപ്രത്യക്ഷമാവും;
ജിമെയിലിന്റെ പരിഷ്കരിച്ച നയങ്ങള്‍, ചിലപ്പോള്‍ നിങ്ങളുടെ അക്കൗണ്ട് നഷ്ടപ്പെടുത്തിയേക്കാം. പ്രവര്‍ത്തനരഹിതമായ ഗൂഗിള്‍ അക്കൗണ്ടുകള്‍ നീക്കം ചെയ്യാൻ പദ്ധതി ഒരുക്കിയിരിക്കുകയാണ് സെര്‍ച്ച്‌ എഞ്ചിൻ ഭീമനായ ഗൂഗിള്‍.
പുതിയ പോളിസി അനുസരിച്ച്‌ രണ്ട് വര്‍ഷത്തിലധികം ലോഗിൻ ചെയ്യാത്തതോ ഉപയോഗിക്കാത്തതോ ആയ അക്കൗണ്ടുകളും അതിലെ പൂര്‍ണ്ണ വിവരങ്ങളും നീക്കം ചെയ്യാനാണ് ഗൂഗിള്‍ തയ്യാറെടുക്കുന്നത്. ഈ വര്‍ഷം ഡിസംബറോടെ തന്നെ അക്കൗണ്ടുകള്‍ നീക്കം ചെയ്തുതുടങ്ങും. ജിമെയില്‍, ഡോക്സ്, ഡ്രൈവ്, മീറ്റ്, കലണ്ടര്‍, ഗൂഗിള്‍ ഫോട്ടോസ് തുടങ്ങിയ സേവനങ്ങളും ഇതില്‍ പെടുന്നു.
എല്ലാത്തരം അക്കൗണ്ടുകള്‍ക്കും പോളിസി ബാധകമാണെന്നും ദീര്‍ഘകാലമായി നിര്‍ജീവമായികിടക്കുന്ന അക്കൗണ്ടുകളില്‍ സുരക്ഷാ പ്രശ്നങ്ങള്‍ ഉണ്ടാകുന്നതാണ് പുതിയ മാറ്റങ്ങള്‍ക്ക് കാരണമെന്നാണ് ഗൂഗിളിന്റെ വിശദീകരണം.
ഉപയോക്താക്കള്‍ ശ്രദ്ധിക്കാത്തതും മറന്നുപോയതുമായ അക്കൗണ്ടുകളില്‍ പഴയതും നിരന്തരമായി ഉപയോഗിച്ചിരുന്നതുമായ പാസ്വേഡുകളാണ് ഉണ്ടാവാൻ സാധ്യത. കൂടാതെ 2-ഫാക്ടര്‍ ഒതന്റിക്കേഷൻ പോലുള്ള സുരക്ഷ സംവിധാനങ്ങളും ഉപയോഗിക്കാൻ സാധ്യത കുറവാണ്. സുരക്ഷാപരമായി നോക്കുമ്ബോള്‍ ഇത് വളരെ വലിയ പോരായ്മയാണ്. കൂടാതെ ആക്ടീവ് അക്കൗണ്ടുകളെ അപേക്ഷിച്ച്‌ പത്തിരട്ടി അധികം അക്കൗണ്ടുകളാണ് 2-ഫാക്ടര്‍ ഒതന്റിക്കേഷൻ ഉപയോഗിക്കാത്തതെന്നും ഗൂഗിള്‍ പ്രൊഡക്റ്റ് മാനേജ്മെന്റ് വിപി റൂത്ത് ക്രിചെലി പറയുന്നു.
ഘട്ടങ്ങളായാണ് ഗൂഗിള്‍, അക്കൗണ്ടുകള്‍ നീക്കം ചെയ്യാനുള്ള നടപടി സ്വീകരിക്കുന്നത്. സൃഷ്ടിച്ച ശേഷം പിന്നീട് ഉപയോഗിച്ചിട്ടില്ലാത്ത അക്കൗണ്ടുകളാണ് ആദ്യം നീക്കം ചെയ്യുക. അക്കൗണ്ട് ഡിലീറ്റാക്കാൻ പോകുന്നു എന്ന സന്ദേശം പല തവണ അയച്ചതിനു ശേഷവും പ്രസ്തുത അക്കൗണ്ടുകള്‍ സജീവമാകുന്നില്ലെങ്കില്‍ ഒരു മാസത്തിനു ശേഷം അവ നീക്കം ചെയ്യും. ഈ അറിയിപ്പ് ഉപയോഗശൂന്യമായ അക്കൗണ്ടിലും റിക്കവറി മെയിലിലും അയക്കും.
ഇത് മറികടക്കുന്നതിന് ഉപയോക്താക്കള്‍ ചെയ്യേണ്ടത്, രണ്ട് വര്‍ഷത്തില്‍ ഒരിക്കല്‍ ലോഗിൻ ചെയ്യുക എന്നതാണ്. നിങ്ങള്‍ അക്കൗണ്ട് ഗൂഗിളിലോ അല്ലെങ്കില്‍ മറ്റേതെങ്കിലും സേവനത്തിലോ സൈൻ ഇൻ ചെയ്തിട്ടുണ്ടെങ്കില്‍, നിങ്ങളെ അക്ടീവായി കണക്കാക്കും, അക്കൗണ്ട് നീക്കം ചെയ്യപ്പെടില്ല.