തിരുവനന്തപുരം:വാഹനാപകടത്തെത്തുടർന്ന് മസ്തിഷ്കമരണം സംഭവിച്ച തിരുവനന്തപുരം സ്വദേശി കൃഷ്ണലാൽ (33) മരണാനന്തര അവയവദാനത്തിലൂടെ അഞ്ചുപേർക്ക് പുതുജീവൻ പകരുന്നു. തിരുവനന്തപുരം കിംസ് ആശുപത്രിയിൽ ചികിത്സയിലിരിക്കെയാണ് മസ്തിഷ്കമരണം സ്ഥിരീകരിച്ചത്. പ്രിയപ്പെട്ടവന്റെ വിയോഗത്തിന്റെ തീരാവേദനയ്ക്കിടയിലും കൃഷ്ണലാലിന്റെ അവയവങ്ങൾ ദാനം ചെയ്യാൻ കുടുംബാംഗങ്ങൾ എടുത്ത തീരുമാനം അഞ്ച് കുടുംബങ്ങൾക്കാണ് പ്രത്യാശയാകുന്നത്.
കൃഷ്ണലാലിന്റെ ഹൃദയം കോട്ടയത്ത് ചികിത്സയിലുള്ള രോഗിക്കായി എയർ ആംബുലൻസ് മാർഗ്ഗം ഉച്ചയ്ക്ക് ഒരു മണിയോടെ കൊണ്ടുപോയി. ഹൃദയത്തിന് പുറമെ രണ്ട് വൃക്കകൾ, കരൾ, കണ്ണ് എന്നിവയും ദാനം ചെയ്തു. ഇവ തിരുവനന്തപുരത്തെ വിവിധ സ്വകാര്യ ആശുപത്രികളിൽ ചികിത്സയിൽ കഴിയുന്നവർക്കാണ് കൈമാറുന്നത്. അടിയന്തരമായി അവയവങ്ങൾ എത്തിക്കുന്നതിനായി കൃത്യമായ സുരക്ഷാക്രമീകരണങ്ങളും ഗ്രീൻ ചാനലും അധികൃതർ ഒരുക്കിയിരുന്നു.
സംസ്ഥാന സർക്കാരിന്റെ മൃതസഞ്ജീവനി പദ്ധതിയുടെ ഏകോപനത്തിലൂടെയാണ് ഈ മാതൃകാപരമായ അവയവദാന പ്രക്രിയ പൂർത്തിയാക്കിയത്. ഉറ്റവരുടെ വിയോഗത്തിൽ വിറങ്ങലിച്ചു നിൽക്കുമ്പോഴും അവയവദാനമെന്ന ഉദാത്തമായ സന്ദേശം ഉയർത്തിപ്പിടിച്ച കൃഷ്ണലാലിന്റെ കുടുംബത്തെ ആദരവോടെയാണ് നാട് നോക്കിക്കാണുന്നത്. അഞ്ച് വ്യക്തികളിലൂടെ കൃഷ്ണലാൽ ഇനി ലോകത്തിന്റെ സ്നേഹസ്മരണകളിൽ ജീവിക്കും.
