ന്യൂഡൽഹി: ടെലിവിഷൻ ചാനലുകളുടെ ജനപ്രീതി അളക്കുന്ന ടിആർപി (TRP) സംവിധാനത്തിൽ നിർണ്ണായക പരിഷ്കാരങ്ങളുമായി കേന്ദ്ര വാർത്താവിനിമയ മന്ത്രാലയം. ചാനലുകളുടെ റേറ്റിങ്ങിൽ കൃത്രിമം കാണിക്കുന്നത് തടയാനും പ്രേക്ഷകരുടെ യഥാർത്ഥ താല്പര്യം പ്രതിഫലിപ്പിക്കാനും ലക്ഷ്യമിട്ടുള്ള പുതിയ നയത്തിനാണ് മന്ത്രാലയം രൂപം നൽകിയിരിക്കുന്നത്. ഇതോടെ ചാനൽ റേറ്റിംഗ് ഏജൻസിയായ ‘ബാർക്കിന്റെ’ (BARC) പ്രവർത്തനരീതികളിലും വലിയ മാറ്റങ്ങൾ വരും.
ലാൻഡിംഗ് പേജുകൾക്ക് തിരിച്ചടി
ടിവി ഓൺ ചെയ്യുമ്പോൾ തനിയെ തെളിഞ്ഞുവരുന്ന ചാനലുകൾ (Landing Page) വഴിയുള്ള പ്രേക്ഷക കണക്കുകൾ ഇനിമുതൽ റേറ്റിംഗിൽ ഉൾപ്പെടുത്തില്ല എന്നതാണ് പുതിയ പരിഷ്കാരങ്ങളിലെ ഏറ്റവും പ്രധാനപ്പെട്ട കാര്യം. സെറ്റ് ടോപ്പ് ബോക്സുകൾ ഓൺ ചെയ്യുമ്പോൾ ആദ്യമെത്തുന്ന ചാനൽ പ്രേക്ഷകർ മനഃപൂർവ്വം തിരഞ്ഞെടുക്കുന്നതല്ലെന്നും, അതിനാൽ അത് റേറ്റിംഗിനെ സ്വാധീനിക്കാൻ പാടില്ലെന്നുമാണ് മന്ത്രാലയത്തിന്റെ നിലപാട്. പ്രേക്ഷകർ താല്പര്യപൂർവ്വം സെലക്ട് ചെയ്ത് കാണുന്ന ചാനലുകൾക്ക് മാത്രമേ ഇനിമുതൽ പോയിന്റുകൾ ലഭിക്കൂ.
സ്വതന്ത്ര ഡയറക്ടർമാരുടെ പാനൽ
റേറ്റിംഗ് ഏജൻസികളുടെ പ്രവർത്തനത്തിൽ സുതാര്യത ഉറപ്പാക്കാൻ ഭരണസമിതിയിൽ (Board) പകുതിയിലധികം പേരും സ്വതന്ത്ര ഡയറക്ടർമാരായിരിക്കണമെന്ന് നയം കർശനമായി വ്യവസ്ഥ ചെയ്യുന്നു. ഈ ഡയറക്ടർമാർക്ക് ചാനൽ ഉടമകളുമായോ പരസ്യ ഏജൻസികളുമായോ യാതൊരുവിധ സാമ്പത്തിക-ബിസിനസ് ബന്ധങ്ങളും ഉണ്ടാകാൻ പാടില്ല. റേറ്റിംഗ് നിശ്ചയിക്കുന്നതിൽ ബാഹ്യമായ ഇടപെടലുകൾ ഒഴിവാക്കാനാണ് ഈ നീക്കം.
പരസ്യവിപണിയിൽ മാറ്റങ്ങൾ വരും
ചാനലുകളുടെ വരുമാനത്തെ നേരിട്ട് ബാധിക്കുന്നതാണ് ടിആർപി റേറ്റിംഗ്. പുതിയ നിയമം വരുന്നതോടെ യഥാർത്ഥ ജനപ്രീതിയുള്ള ചാനലുകൾക്ക് മാത്രമേ പരസ്യങ്ങൾ ലഭിക്കൂ എന്ന സാഹചര്യം വരും. നിലവിൽ ലാൻഡിംഗ് പേജുകൾക്കായി കോടികൾ ചെലവാക്കി റേറ്റിംഗ് കൂട്ടിയിരുന്ന ചാനലുകൾക്ക് പുതിയ പരിഷ്കാരം വലിയ തിരിച്ചടിയാകും. ചാനൽ റേറ്റിംഗ് വിവാദങ്ങൾ രാജ്യത്ത് വലിയ ചർച്ചയായ പശ്ചാത്തലത്തിലാണ് കേന്ദ്രത്തിന്റെ ഈ നീക്കം.
