ന്യൂഡൽഹി: പശ്ചിമേഷ്യൻ യുദ്ധസാഹചര്യത്തിൽ ആഗോള വിപണിയിൽ എണ്ണവില ഉയരുന്നതിനിടെ, രാജ്യത്തെ ഇന്ധന വിപണിയിൽ ഇടപെട്ട് കേന്ദ്രസർക്കാർ. പെട്രോളിന്റെയും ഡീസലിന്റെയും അധിക എക്സൈസ് തീരുവ കേന്ദ്രം കുത്തനെ വെട്ടിക്കുറച്ചു. പെട്രോളിന് ലിറ്ററിന് 13 രൂപയിൽ നിന്ന് 3 രൂപയായും, ഡീസലിന് ലിറ്ററിന് 10 രൂപയിൽ നിന്ന് പൂജ്യമായുമാണ് തീരുവ കുറച്ചിരിക്കുന്നത്.
കമ്പനികൾക്ക് ആശ്വാസം; ചില്ലറ വിലയിൽ മാറ്റമുണ്ടാകില്ല
എക്സൈസ് തീരുവ കുറച്ചെങ്കിലും സാധാരണ ഉപഭോക്താക്കൾക്ക് ചില്ലറ വിൽപനയിൽ ഉടൻ വിലക്കുറവ് ലഭിക്കാൻ സാധ്യതയില്ല. രാജ്യാന്തര വിപണിയിലെ വിലവർധനവ് മൂലം നഷ്ടം നേരിടുന്ന എണ്ണക്കമ്പനികൾക്ക് ആശ്വാസം നൽകാനാണ് ഈ നടപടി. സ്വകാര്യ കമ്പനികൾ ഇന്ധനവില ഉയർത്താൻ ഒരുങ്ങുന്നു എന്ന അഭ്യൂഹങ്ങൾക്കിടെയാണ് സർക്കാരിന്റെ ഈ അടിയന്തര ഇടപെടൽ.
നയാര വില വർധിപ്പിച്ചു
രാജ്യത്തെ ഏറ്റവും വലിയ സ്വകാര്യ ഇന്ധന റീട്ടെയിലറായ നയാര (Nayara) കഴിഞ്ഞ ദിവസം ഇന്ധനവില വർധിപ്പിച്ചിരുന്നു. പെട്രോളിന് 5.30 രൂപയും ഡീസലിന് 3 രൂപയുമാണ് കമ്പനി കൂട്ടിയത്. ഗുജറാത്തിലെ വാഡിനാർ റിഫൈനറിയിലെ പ്രവർത്തനങ്ങൾ താൽക്കാലികമായി നിർത്തിവയ്ക്കാൻ ഒരുങ്ങുന്നതിനിടെയാണ് രാജ്യത്തുടനീളം 6,660 ഔട്ട്ലെറ്റുകളുള്ള നയാരയുടെ ഈ നീക്കം. എന്നാൽ പൊതുമേഖലാ എണ്ണക്കമ്പനികളോ മറ്റ് സ്വകാര്യ ഏജൻസികളോ നിലവിൽ വില വർധിപ്പിച്ചിട്ടില്ല.
ആഭ്യന്തര വിപണിയിൽ ഇന്ധനലഭ്യത ഉറപ്പാക്കാനും വിലക്കയറ്റം നിയന്ത്രിക്കാനും കേന്ദ്രത്തിന്റെ പുതിയ തീരുമാനം സഹായിക്കുമെന്നാണ് വിലയിരുത്തപ്പെടുന്നത്.
