തിരുവനന്തപുരം: ബോഡി ബിൽഡിങ് താരങ്ങളെ പൊലീസ് സേനയിൽ ഇൻസ്പെക്ടർമാരായി നേരിട്ട് നിയമിക്കാനുള്ള വിവാദ തീരുമാനത്തിന് പിന്നാലെ, ലോക ബോഡി ബിൽഡിങ് ചാമ്പ്യൻ ചിത്തരേഷ് നടേശന്റെ നിയമനം അനിശ്ചിതത്വത്തിൽ. വൈദ്യപരിശോധനയിൽ ചിത്തരേഷിന് ‘ഫ്ലാറ്റ് ഫുട്ട്’ (Flat Foot) കണ്ടെത്തിയതാണ് തിരിച്ചടിയായത്. സേനയിലെ ചട്ടപ്രകാരം ഫ്ലാറ്റ് ഫുട്ട് ഉള്ളവർക്ക് നിയമനം നൽകാൻ സാധിക്കില്ല. അതേസമയം, പട്ടികയിലുണ്ടായിരുന്ന മറ്റൊരു താരമായ ഷിനു ചൊവ്വ വൈദ്യപരിശോധനയിൽ യോഗ്യത നേടി.
വിവാദമായി പ്രത്യേക നിയമനം
ഒളിമ്പിക്സിലോ ദേശീയ ഗെയിംസിലോ ഉൾപ്പെടാത്ത കായിക ഇനമായ ബോഡി ബിൽഡിങ്ങിലെ വിജയികളെ ആംഡ് പൊലീസ് ഇൻസ്പെക്ടർമാരായി നിയമിക്കാനുള്ള സർക്കാർ തീരുമാനം നേരത്തെ തന്നെ വലിയ ചർച്ചയായിരുന്നു. സാധാരണഗതിയിൽ സ്പോർട്സ് ക്വാട്ട നിയമനങ്ങൾ അംഗീകൃത കായിക ഇനങ്ങളിൽ മെഡൽ നേടുന്നവർക്ക് മാത്രമാണ് നൽകുന്നത്. എന്നാൽ, ചിത്തരേഷ് നടേശനും ഷിനു ചൊവ്വയ്ക്കും വേണ്ടി ചട്ടങ്ങളിൽ ഇളവ് വരുത്തി സൂപ്പർന്യൂമറി തസ്തികകൾ സൃഷ്ടിച്ചാണ് ഗസറ്റഡ് പദവിയിലുള്ള നിയമനത്തിന് മന്ത്രിസഭ ഉത്തരവിട്ടത്.
നിയമനത്തിലെ ഇരട്ടത്താപ്പ്
ഏഷ്യൻ ഗെയിംസ് മെഡൽ ജേതാവായ എം. ശ്രീശങ്കറിന് ആംഡ് ഇൻസ്പെക്ടർ തസ്തികയിൽ നിയമനം നൽകണമെന്ന ഡി.ജി.പിയുടെ ശുപാർശ സർക്കാർ നേരത്തെ തള്ളിയിരുന്നു. ഗസറ്റഡ് തസ്തികയിലേക്ക് നേരിട്ട് നിയമനം നൽകാൻ ചട്ടമില്ലെന്ന കാരണം പറഞ്ഞായിരുന്നു ഇത്. എന്നാൽ, ഈ നിലപാട് നിലനിൽക്കെത്തന്നെ ബോഡി ബിൽഡിങ് താരങ്ങളെ അതേ തസ്തികയിൽ നിയമിക്കാൻ സർക്കാർ പ്രത്യേക താല്പര്യമെടുത്തത് കായിക മേഖലയിൽ വലിയ പ്രതിഷേധത്തിന് ഇടയാക്കിയിട്ടുണ്ട്.
ദേശീയ-അന്തർദേശീയ തലങ്ങളിൽ മറ്റ് കായിക ഇനങ്ങളിൽ മെഡൽ നേടി വർഷങ്ങളായി നിയമനത്തിനായി കാത്തുനിൽക്കുന്ന താരങ്ങൾ പുറത്തുനിൽക്കുമ്പോഴാണ്, മാനദണ്ഡങ്ങൾ മറികടന്നുള്ള ഈ നീക്കം. കായികക്ഷമത പരിശോധനയിൽ പരാജയപ്പെട്ടവരെ ഇൻസ്പെക്ടർമാരായി നിയമിക്കുന്നു എന്ന ആരോപണവും ഇതിനിടെ ഉയർന്നിരുന്നു. നിലവിൽ വൈദ്യപരിശോധനയിലെ തടസ്സം ചിത്തരേഷിന്റെ നിയമനത്തെ എങ്ങനെ ബാധിക്കുമെന്നതിൽ ഔദ്യോഗിക സ്ഥിരീകരണം വന്നിട്ടില്ല.
