തിരുവനന്തപുരം:കണ്ണൂർ മുൻ എ.ഡി.എം കെ. നവീൻ ബാബുവിന്റെ ആത്മഹത്യാ കേസ് സിബിഐ അന്വേഷിക്കും. നീതിതേടിയുള്ള കുടുംബത്തിന്റെ നിരന്തരമായ ആവശ്യങ്ങൾ പരിഗണിച്ചാണ് ഒടുവിൽ കേസ് കേന്ദ്ര അന്വേഷണ ഏജൻസിക്ക് വിടാൻ സർക്കാർ തീരുമാനിച്ചത്. നവീൻ ബാബുവിന്റെ ഭാര്യയും കുടുംബാംഗങ്ങളും മുഖ്യമന്ത്രി വി.ഡി. സതീശനെ നേരിട്ട് കണ്ട് സിബിഐ അന്വേഷണം വേണമെന്ന ആവശ്യം ഉന്നയിച്ചിരുന്നു. ഇതിന് പിന്നാലെയാണ് നിർണായക ഉത്തരവ് പുറത്തുവന്നിരിക്കുന്നത്.
നേരത്തെ അധികാരത്തിലിരുന്ന സർക്കാർ കേസിൽ സിബിഐ അന്വേഷണം ആവശ്യമില്ലെന്ന നിലപാടാണ് ഹൈക്കോടതിയെ അറിയിച്ചിരുന്നത്. ഇതിന്റെ അടിസ്ഥാനത്തിൽ ഹൈക്കോടതിയും സിബിഐ അന്വേഷണം വേണ്ടെന്ന നിഗമനത്തിൽ എത്തിയിരുന്നു. എന്നാൽ കുടുംബത്തിന്റെ ശക്തമായ ആവശ്യവും കേസിന്റെ ഗൗരവവും കണക്കിലെടുത്ത് നിലവിലെ സർക്കാർ ഈ നിലപാട് തിരുത്തി കേസ് സിബിഐക്ക് കൈമാറുകയായിരുന്നു.
കണ്ണൂരിനെ പിടിച്ചുകുലുക്കിയ ദുരൂഹ മരണം
കണ്ണൂർ എ.ഡി.എം ആയിരുന്ന നവീൻ ബാബുവിനെ ക്വാർട്ടേഴ്സിൽ തൂങ്ങിമരിച്ച നിലയിൽ കണ്ടെത്തിയത് കേരളത്തിലുടനീളം വലിയ രാഷ്ട്രീയ-സാമൂഹിക ചർച്ചകൾക്ക് വഴിവെച്ചിരുന്നു. പെട്രോൾ പമ്പിന് അനുമതി നൽകുന്നതുമായി ബന്ധപ്പെട്ട് അഴിമതി ആരോപണം ഉയർന്നതിന് പിന്നാലെയായിരുന്നു മരണം.
നവീൻ ബാബുവിന്റെ സ്ഥലംമാറ്റവുമായി ബന്ധപ്പെട്ട് നടന്ന ഔദ്യോഗിക യാത്രയയപ്പ് യോഗത്തിലേക്ക് ക്ഷണിക്കാതെ എത്തിയ കണ്ണൂർ ജില്ലാ പഞ്ചായത്ത് മുൻ പ്രസിഡന്റ് പി.പി. ദിവ്യ അദ്ദേഹത്തിനെതിരെ പരസ്യമായി അഴിമതി ആരോപണം ഉന്നയിച്ചിരുന്നു.
കളക്ടറുടെയും സഹപ്രവർത്തകരുടെയും മുന്നിൽ വെച്ച് അഴിമതിക്കാരനായി ചിത്രീകരിക്കപ്പെട്ടതിലുള്ള കടുത്ത മാനസിക വിഷമമാണ് നവീൻ ബാബുവിനെ ആത്മഹത്യയിലേക്ക് നയിച്ചതെന്നാണ് കുടുംബത്തിന്റെ ആരോപണം. സംഭവത്തിന് പിന്നാലെ പി.പി. ദിവ്യക്കെതിരെ ആത്മഹത്യാ പ്രേരണക്കുറ്റത്തിന് പോലീസ് കേസെടുക്കുകയും അവരെ ജില്ലാ പഞ്ചായത്ത് പ്രസിഡന്റ് സ്ഥാനത്തുനിന്ന് നീക്കുകയും ചെയ്തിരുന്നു.
ലോക്കൽ പോലീസിന്റെയും പ്രത്യേക സംഘത്തിന്റെയും അന്വേഷണം തൃപ്തികരമല്ലെന്നും, മരണത്തിന് പിന്നിലെ യഥാർത്ഥ ഗൂഢാലോചന പുറത്തുകൊണ്ടുവരാൻ കേന്ദ്ര ഏജൻസി തന്നെ വേണമെന്നുമുള്ള ഉറച്ച നിലപാടിലായിരുന്നു നവീൻ ബാബുവിന്റെ കുടുംബം. മുഖ്യമന്ത്രി വി.ഡി. സതീശനുമായി നടത്തിയ കൂടിക്കാഴ്ചയ്ക്ക് പിന്നാലെ സിബിഐ അന്വേഷണത്തിന് ഉത്തരവായത് കേസിൽ വലിയ വഴിത്തിരിവാകും.
