കൊല്ലം: കള്ളക്കടൽ പ്രതിഭാസത്തിന്റെ ഭാഗമായി ആലപ്പാട്ട് മുതല് ഇടവ വരെയുള്ള തീരദേശമേഖലയില് ഓഗസ്റ്റ് 10 വൈകുന്നേരം 5:30 വരെ 1.8 മീറ്റര് വരെ ഉയര്ന്ന തിരമാലകള് ഉണ്ടാകാമെന്നും കടലാക്രമണത്തിന് സാധ്യതയുണ്ടെന്നും ദേശീയ സമുദ്രസ്ഥിതി പഠന-ഗവേഷണകേന്ദ്രം മുന്നറിയിപ്പ് നല്കി. മത്സ്യത്തൊഴിലാളികളും തീരദേശവാസികളും കടലില് ഇറങ്ങരുതെന്നും ജാഗ്രതാനിര്ദേശങ്ങള് കര്ശനമായി പാലിക്കണമെന്നും ജില്ലാ കലക്ടര് അറിയിച്ചു.
ജാഗ്രതാനിര്ദേശങ്ങള്:
കടല്ക്ഷോഭം രൂക്ഷമാകാന് സാധ്യതയുള്ളതിനാല് അപകടമേഖലകളില്നിന്ന് അധികൃതരുടെ നിര്ദേശാനുസരണം മാറിതാമസിക്കണം.
ചെറിയ വള്ളങ്ങളും ബോട്ടുകളും കടലിലേക്ക് ഇറക്കുന്നത് ഒഴിവാക്കണം.
തിരമാല ശക്തിപ്പെടുന്നഘട്ടത്തില് മത്സ്യബന്ധനയാനങ്ങള് കടലിലേക്ക് ഇറക്കുന്നതും കരക്കടുപ്പിക്കുന്നതും ഒഴിവാക്കണം.
മുന്നറിയിപ്പ് പിന്വലിക്കുന്നത് വരെ ബീച്ചുകള്കേന്ദ്രീകരിച്ചുള്ള വിനോദസഞ്ചാരമുള്പ്പെടെയുള്ള എല്ലാ പ്രവര്ത്തനങ്ങളും പൂര്ണമായി നിര്ത്തണം.
മത്സ്യ ബന്ധനയാനങ്ങള് ഹാര്ബറില് സുരക്ഷിതമായി കെട്ടിയിടുക. വള്ളങ്ങള്തമ്മില് സുരക്ഷിതഅകലംപാലിക്കുന്നത് അപകടസാധ്യത ഒഴിവാക്കും. മത്സ്യ ബന്ധന ഉപകരണങ്ങളുടെ സുരക്ഷയും ഉറപ്പാക്കണം.
ബീച്ചിലേക്കുള്ള യാത്രകളും കടലില് ഇറങ്ങിയുള്ള വിനോദങ്ങളും ഒഴിവാക്കുക.
തീരശോഷണത്തിനു സാധ്യതയുള്ളതിനാല് പ്രത്യേകം ജാഗ്രതപുലര്ത്തുക.
