കൊച്ചി: ചേരാനല്ലൂർ വാഹനാപകടക്കേസിൽ അന്വേഷണത്തിൽ ഗുരുതര വീഴ്ച വരുത്തിയതിന് എസ്.എച്ച്.ഒ ഉൾപ്പെടെ നാല് പോലീസ് ഉദ്യോഗസ്ഥരെ അന്വേഷണവിധേയമായി സസ്പെൻഡ് ചെയ്തു. സി.ഐ ശ്യാംകുമാർ കെ.എസ്., എസ്.എച്ച്.ഒ വിശ്വജിത്ത്, ഗ്രേഡ് എസ്.ഐ കെ.ടി. മനോജ്, സി.പി.ഒ അരുൺ ജിത്ത് എന്നിവർക്കെതിരെയാണ് നടപടി.
അഡീഷണൽ ജില്ലാ ജഡ്ജിയുടെ 17-കാരനായ മകൻ ഓടിച്ച ആഡംബര ബെൻസ് കാറിടിച്ച് സ്കൂട്ടർ യാത്രക്കാരനായ ജയബാലകൃഷ്ണൻ മരിച്ച സംഭവത്തിലാണ് നടപടി. പ്രതിയെ സംരക്ഷിക്കുന്ന തരത്തിൽ ദുർബലമായ വകുപ്പുകൾ ചുമത്തി എഫ്.ഐ.ആർ തയ്യാറാക്കുകയും പ്രതിയെ സ്റ്റേഷൻ ജാമ്യത്തിൽ വിട്ടയക്കുകയും ചെയ്തതായാണ് ആരോപണം.
അപകടസ്ഥലം സന്ദർശിച്ച എ.ഡി.ജി.പി പി. വിജയൻ സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് നടപടിയെന്ന് ആഭ്യന്തരമന്ത്രി രമേശ് ചെന്നിത്തല നിയമസഭയിൽ അറിയിച്ചു. പോലീസിന്റെ നടപടിക്കെതിരെ മരിച്ച ജയബാലകൃഷ്ണന്റെ കുടുംബവും വിവിധ സംഘടനകളും ചേരാനല്ലൂർ പോലീസ് സ്റ്റേഷന് മുന്നിൽ പ്രതിഷേധിച്ചിരുന്നു.
കേസ് ക്രൈംബ്രാഞ്ചിന് കൈമാറിയിട്ടുണ്ട്. അപകടമുണ്ടാക്കിയ വാഹനത്തിന്റെ ഉടമയായ ജഡ്ജിക്കെതിരെയും മോട്ടോർ വാഹന നിയമപ്രകാരം കേസെടുത്തിട്ടുണ്ട്. പ്രതിയുടെ ജാമ്യം റദ്ദാക്കുന്നതിനായി മേൽക്കോടതിയെ സമീപിക്കാനും സർക്കാർ തീരുമാനിച്ചിട്ടുണ്ട്.
