കൊല്ലം: കേരള സർക്കാരിന്റെ പ്രതിനിധിയായി ക്യാബിനറ്റ് റാങ്കോടെ ന്യൂഡൽഹിയിൽ നിയമിതനായ ഓൾ ഇന്ത്യ ഫോർവേഡ് ബ്ലോക്ക് ദേശീയ ജനറൽ സെക്രട്ടറി ജി. ദേവരാജനെ ജേർണലിസ്റ്റ് ആൻഡ് മീഡിയ അസോസിയേഷൻ (ജെ.എം.എ) ഭാരവാഹികൾ മൊമെന്റോ നൽകി ആദരിച്ചു.
നേതാജി സുഭാഷ് ചന്ദ്രബോസ് 1939-ൽ സ്ഥാപിച്ച ഫോർവേഡ് ബ്ലോക്ക് ദേശീയ പ്രസ്ഥാനത്തിന്റെ പാരമ്പര്യം ഉയർത്തിപ്പിടിച്ച് പ്രവർത്തിക്കുന്ന രാഷ്ട്രീയ സംഘടനയാണ്. ദേശീയ രാഷ്ട്രീയത്തിൽ സജീവമായ ജി. ദേവരാജൻ കേരള സർക്കാരിന്റെ ഡൽഹിയിലെ പ്രതിനിധിയായി ചുമതലയേറ്റത് ശ്രദ്ധേയമാണ്.
മാധ്യമപ്രവർത്തകരുടെ അവകാശസംരക്ഷണം, തൊഴിൽപരമായ സുരക്ഷ, മാധ്യമസ്വാതന്ത്ര്യം, ധാർമികവും ഉത്തരവാദിത്വപൂർണവുമായ മാധ്യമപ്രവർത്തനം എന്നിവ ലക്ഷ്യമിട്ട് ദേശീയതലത്തിൽ പ്രവർത്തിക്കുന്ന സംഘടനയാണ് ജേർണലിസ്റ്റ് ആൻഡ് മീഡിയ അസോസിയേഷൻ. ഡിജിറ്റൽ വാർത്താ പ്രസാധകരുടെ പരാതികൾ പരിഹരിക്കുന്നതിനുള്ള സ്വയംനിയന്ത്രണ സംവിധാനത്തിലും സംഘടനയ്ക്ക് പങ്കാളിത്തമുണ്ട്.
അസോസിയേഷന്റെ പ്രവർത്തനങ്ങൾക്ക് ജി. ദേവരാജൻ ആശംസകൾ നേർന്നു. ദേശീയ പ്രസിഡന്റ് വൈശാഖ് സുരേഷ്, ദേശീയ സെക്രട്ടറി ഷിബു കൂട്ടുംവാതുക്കൽ, സംസ്ഥാന വൈസ് പ്രസിഡന്റ് ഓടനാവട്ടം അശോക്, തിരുവനന്തപുരം ജില്ലാ പ്രസിഡന്റ് സുരേഷ്, സംസ്ഥാന കമ്മിറ്റി അംഗം ഷീജ എന്നിവർ ചടങ്ങിന് നേതൃത്വം നൽകി.
