ദില്ലി :രാജ്യത്ത് പെട്രോൾ, ഡീസൽ വിലയിൽ ലിറ്ററിന് മൂന്ന് രൂപ വീതം വർധിപ്പിച്ചു. പുതുക്കിയ നിരക്കുകൾ നിലവിൽ വന്നതോടെ സാധാരണക്കാരുടെ ബജറ്റിനെ ബാധിക്കുന്ന വലിയൊരു വർധനവാണ് രേഖപ്പെടുത്തിയിരിക്കുന്നത്. പുതിയ മാറ്റ പ്രകാരം കൊച്ചിയിൽ ഒരു ലിറ്റർ പെട്രോളിന് 108.74 രൂപയും ഡീസലിന് 97.63 രൂപയുമാണ് നൽകേണ്ടത്. പശ്ചിമേഷ്യൻ മേഖലയിൽ നിലനിൽക്കുന്ന രാഷ്ട്രീയ സംഘർഷങ്ങൾ ആഗോള ഊർജ്ജ വിപണിയെ ബാധിക്കുമെന്ന അഭ്യൂഹങ്ങൾക്കിടെയാണ് ഈ നടപടി. ഇന്ധന ഉപയോഗം കുറയ്ക്കണമെന്ന് കഴിഞ്ഞ ദിവസം പ്രധാനമന്ത്രി നടത്തിയ പ്രസ്താവന വില വർധനവിന്റെ മുന്നോടിയായിരുന്നുവെന്ന് സാമ്പത്തിക വിദഗ്ധർ ഇപ്പോൾ ചൂണ്ടിക്കാട്ടുന്നു. ഇന്ധനവിലയിലുണ്ടായ ഈ പെട്ടെന്നുള്ള വർധനവ് വരും ദിവസങ്ങളിൽ ചരക്കുകൂലി വർധിക്കുന്നതിനും തന്മൂലം നിത്യോപയോഗ സാധനങ്ങളുടെ വിലക്കയറ്റത്തിനും കാരണമായേക്കാം.
അതേസമയം, അന്താരാഷ്ട്ര തലത്തിൽ ഇറാൻ സംഘർഷത്തെത്തുടർന്ന് ഊർജ്ജ വിതരണത്തിൽ തടസ്സങ്ങൾ നേരിടുന്നുണ്ടെങ്കിലും ഇന്ത്യയിൽ ഇന്ധനക്ഷാമം ഉണ്ടാകില്ലെന്ന് കേന്ദ്ര സർക്കാർ ജനങ്ങൾക്ക് ഉറപ്പുനൽകിയിട്ടുണ്ട്. രാജ്യത്ത് നിലവിൽ 60 ദിവസത്തേക്കുള്ള ഇന്ധന ശേഖരവും 45 ദിവസത്തേക്കുള്ള എൽപിജി ശേഖരവും ലഭ്യമാണെന്ന് അധികൃതർ വ്യക്തമാക്കി. നിലവിൽ ഇന്ധന നിയന്ത്രണം ഏർപ്പെടുത്താൻ സർക്കാരിന് യാതൊരു പദ്ധതിയുമില്ലെന്ന് ഓയിൽ സെക്രട്ടറി നീരജ് മിത്തൽ അറിയിച്ചു. വിതരണ ശൃംഖലയിൽ തടസ്സങ്ങൾ ഉണ്ടാകാതിരിക്കാൻ സർക്കാർ മുൻകരുതലുകൾ എടുക്കുന്നുണ്ടെങ്കിലും, ആഗോള വിപണിയിലെ അസ്ഥിരത ആഭ്യന്തര വിപണിയിൽ ഇനിയും പ്രതിഫലിക്കുമോ എന്ന ആശങ്ക നിലനിൽക്കുന്നുണ്ട്.
