കേരളം ജയിക്കും യുഡിഎഫ് നയിക്കും’; ഇന്ദിര ഗ്യാരന്റിയുമായി യുഡിഎഫ് പ്രകടനപത്രിക പുറത്തിറക്കി

തിരുവനന്തപുരം: ‘കേരളം ജയിക്കും യുഡിഎഫ് നയിക്കും’ എന്ന മുദ്രാവാക്യമുയർത്തി, ജനപ്രിയ വാഗ്ദാനങ്ങൾ ഉൾക്കൊള്ളിച്ചുകൊണ്ടുള്ള യുഡിഎഫിന്റെ തിരഞ്ഞെടുപ്പ് പ്രകടനപത്രിക പുറത്തിറക്കി. തെലങ്കാന മുഖ്യമന്ത്രി രേവന്ത് റെഡ്ഢിയാണ് ‘ഇന്ദിര ഗ്യാരന്റി’ എന്ന് വിശേഷിപ്പിക്കപ്പെട്ട പത്രിക പ്രകാശനം ചെയ്തത്. ക്ഷേമ പെൻഷൻ വർധനയും സൗജന്യ ചികിത്സയും ഉൾപ്പെടെ സാധാരണക്കാരെയും യുവജനങ്ങളെയും ലക്ഷ്യം വെച്ചുള്ള വമ്പൻ പ്രഖ്യാപനങ്ങളാണ് പത്രികയിലുള്ളത്.

പ്രധാന വാഗ്ദാനങ്ങൾ:

• ​സ്ത്രീക്ഷേമം: സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര അനുവദിക്കും. കോളജ് വിദ്യാർഥിനികൾക്ക് പ്രതിമാസം 1000 രൂപ ധനസഹായം നൽകും.
• ​ആരോഗ്യ സുരക്ഷ: എല്ലാ കുടുംബങ്ങൾക്കും 25 ലക്ഷം രൂപ വരെ സൗജന്യ ചികിത്സ ഉറപ്പാക്കുന്ന ‘ഉമ്മൻ ചാണ്ടി ആരോഗ്യ ഇൻഷുറൻസ്’ നടപ്പിലാക്കും. സർക്കാർ ആശുപത്രികളിൽ രോഗികൾക്ക് ‘ബെഡ്’ അവകാശമായി മാറ്റും.
• ​ക്ഷേമ പെൻഷൻ: ക്ഷേമ പെൻഷനുകൾ 3000 രൂപയായി വർധിപ്പിക്കും.
• ​യുവജനങ്ങൾക്ക് ‘യുവശ്രീ’: കുടുംബശ്രീ മാതൃകയിൽ യുവാക്കൾക്കായി ‘യുവശ്രീ’ പദ്ധതി. പുതിയ സംരംഭങ്ങൾ തുടങ്ങാൻ യുവാക്കൾക്ക് 5 ലക്ഷം രൂപ വരെ പലിശരഹിത വായ്പ നൽകും.
• ​വിദ്യാഭ്യാസ സ്കോളർഷിപ്പ്: ഇന്ത്യയിലും വിദേശത്തും ഉപരിപഠനത്തിന് അർഹരായ കുട്ടികൾക്ക് കെ.ആർ. നാരായണൻ സ്കോളർഷിപ്പും ലോൺ സ്കോളർഷിപ്പും ലഭ്യമാക്കും.

ആരോഗ്യരംഗത്തെ വിപ്ലവം

​കേരളത്തെ ലോകോത്തര ഹെൽത്ത് ഡെസ്റ്റിനേഷനാക്കി മാറ്റുമെന്ന പ്രഖ്യാപനമാണ് പത്രികയിലെ ശ്രദ്ധേയമായ ഒന്ന്. ജിപ്‌മർ മാതൃകയിൽ ‘ബിൽ രഹിത ആശുപത്രികൾ’, പഞ്ചായത്തുകളിൽ അത്യാധുനിക ആംബുലൻസ് സൗകര്യം, മൊബൈൽ കീമോതെറപ്പി യൂണിറ്റുകൾ, നിർധന സ്ത്രീകൾക്ക് സൗജന്യ മാമ്മോഗ്രാം എന്നിവയും ഇതിൽ ഉൾപ്പെടുന്നു. ബിപിഎൽ കുടുംബങ്ങളിലെ രോഗികൾക്ക് ഡയാലിസിസ് പൂർണ്ണമായും സൗജന്യമാക്കും.

​വികസന സ്വപ്നങ്ങൾ

​വയനാട് ട്രൈബൽ യൂണിവേഴ്സിറ്റി, മിഷൻ സമുദ്ര, വ്യോമയാന വികസനം, ജോബ് വാച്ച് ടവർ തുടങ്ങിയവ യുഡിഎഫിന്റെ സ്വപ്ന പദ്ധതികളായി പത്രികയിൽ ഇടംപിടിച്ചിട്ടുണ്ട്. ഓൺലൈൻ ടാക്സി മേഖലയിലെ പ്രശ്നങ്ങൾ പരിഹരിക്കാൻ 24/7 കസ്റ്റമർ കെയർ സംവിധാനം കൊണ്ടുവരും.

നിരീക്ഷണത്തിന് പ്രത്യേക സമിതി

വാഗ്ദാനങ്ങൾ കേവലം പ്രഖ്യാപനങ്ങളായി മാറില്ലെന്ന് ഉറപ്പാക്കാൻ പ്രത്യേക ‘എംപവറിങ് കമ്മിറ്റി’ രൂപീകരിക്കും. പത്രികയിലെ കാര്യങ്ങൾ കൃത്യമായി നടപ്പാക്കുന്നുണ്ടോ എന്ന് ഈ സമിതി നിരീക്ഷിക്കും. ആശാ വർക്കർമാരുടെ ദിവസവേതനം 700 രൂപയാക്കി ഉയർത്തുമെന്നും പാചക തൊഴിലാളികളുടെ ഓണറേറിയം വർധിപ്പിക്കുമെന്നും പത്രിക ഉറപ്പുനൽകുന്നു.

മുതിർന്ന പൗരന്മാർക്കായി പ്രത്യേക വകുപ്പ് രൂപീകരിക്കുന്നത് ഉൾപ്പെടെ സമൂഹത്തിലെ എല്ലാ വിഭാഗങ്ങളെയും പരിഗണിക്കുന്ന വികസന കാഴ്ചപ്പാടാണ് യുഡിഎഫ് മുന്നോട്ടുവെക്കുന്നത്.