പുതുക്കിയ റാങ്ക് പട്ടിക പ്രകാരം നിയമന ശുപാർശ; കോടതിയെ സമീപിക്കാനൊരുങ്ങി അരുൺ ജെ. പ്രതാപൻ
തിരുവനന്തപുരം: സംസ്ഥാന ആസൂത്രണ ബോർഡിലെ പരീക്ഷാ മൂല്യനിർണയ ക്രമക്കേടിൽ നിർണായക തിരുത്തൽ നടപടികളുമായി പി.എസ്.സി. പുനർമൂല്യനിർണയത്തിലൂടെ ഒന്നാം റാങ്കിലെത്തിയ പരാതിക്കാരൻ ശ്യാം കൃഷ്ണന് നിയമനം നൽകാൻ പി.എസ്.സി. തീരുമാനിച്ചു. പുതുക്കിയ റാങ്ക് പട്ടികയുടെ അടിസ്ഥാനത്തിൽ ശ്യാം കൃഷ്ണന് നിയമന ശുപാർശ നൽകുന്നതിനൊപ്പം, പഴയ റാങ്ക് പട്ടികയുടെ അടിസ്ഥാനത്തിൽ നിയമനം നേടിയ അരുൺ ജെ. പ്രതാപന്റെ നിയമനം റദ്ദാക്കാനും നീക്കമുണ്ട്. അതേസമയം, നിയമനം റദ്ദാക്കാനുള്ള നടപടിക്കെതിരെ കോടതിയെ സമീപിക്കാനാണ് അരുൺ ജെ. പ്രതാപന്റെ നീക്കം.
ആദ്യ റാങ്ക് പട്ടികയിൽ മൂന്നാം സ്ഥാനത്തായിരുന്ന ശ്യാം കൃഷ്ണൻ വിവരാവകാശ നിയമപ്രകാരം ഉത്തരക്കടലാസ് വാങ്ങി പരിശോധിച്ചതോടെയാണ് മൂല്യനിർണയത്തിലെ ഗുരുതര വീഴ്ച പുറത്തുവന്നത്. 58 മാർക്കിന്റെ പത്ത് വിവരണാത്മക ചോദ്യങ്ങൾ മൂല്യനിർണയം നടത്താതെ വിട്ടുകളഞ്ഞതായി കണ്ടെത്തിയതിനെത്തുടർന്നാണ് പരാതി ഉയർന്നത്.
തുടർന്ന് ഹൈക്കോടതി ഇടപെടലിനെത്തുടർന്ന് ഉത്തരക്കടലാസുകൾ പുനർമൂല്യനിർണയം നടത്തി പുതുക്കിയ റാങ്ക് പട്ടിക പ്രസിദ്ധീകരിച്ചു. ഇതോടെ ശ്യാം കൃഷ്ണൻ ഒന്നാം റാങ്കിലെത്തി. ആദ്യ പട്ടികയിൽ ഒന്നാം റാങ്ക് നേടി നിയമനം ലഭിച്ച അരുൺ ജെ. പ്രതാപൻ പുതിയ പട്ടികയിൽ അഞ്ചാം സ്ഥാനത്തേക്ക് പിന്തള്ളപ്പെട്ടു.
പുതിയ റാങ്ക് പട്ടികയുടെ അടിസ്ഥാനത്തിൽ നിയമന നടപടികൾ സ്വീകരിക്കുന്നതോടെ നേരത്തേ നിയമനം ലഭിച്ച ഉദ്യോഗാർഥിയുടെ നിയമനവും നിയമപരമായ പരിശോധനയ്ക്ക് വിധേയമാകും. അരുൺ ജെ. പ്രതാപൻ കോടതിയെ സമീപിക്കാനൊരുങ്ങുന്നതോടെ നിയമനവുമായി ബന്ധപ്പെട്ട തർക്കം കൂടുതൽ നിയമപോരാട്ടങ്ങളിലേക്ക് നീങ്ങാനുള്ള സാധ്യതയുണ്ട്.
പരീക്ഷാ മൂല്യനിർണയത്തിലെ വീഴ്ച സംബന്ധിച്ച് ക്രൈംബ്രാഞ്ച് പ്രത്യേക സംഘം എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തിവരികയാണ്. ഉദ്യോഗാർഥിയുടെ പരാതിയിലൂടെ പുറത്തുവന്ന ക്രമക്കേട് പി.എസ്.സി. പരീക്ഷകളുടെ മൂല്യനിർണയ നടപടികളുടെ വിശ്വാസ്യതയെക്കുറിച്ചും ചോദ്യങ്ങളുയർത്തിയിട്ടുണ്ട്.
