By: ഷിബു കൂട്ടുംവാതുക്കൾ
സംസ്ഥാനത്തിന് കഴിയുന്നില്ലെങ്കിൽ വികസനവും നടത്തിപ്പും കേന്ദ്രത്തിന് കൈമാറണം; അരവണ ക്ഷാമത്തിൽ സർക്കാരിനെതിരെ വിമർശനം
പത്തനംതിട്ട: ശബരിമലയുടെ വികസനവും നടത്തിപ്പും കാര്യക്ഷമമായി നടത്താൻ സംസ്ഥാന സർക്കാരിന് കഴിയുന്നില്ലെങ്കിൽ കേന്ദ്രസർക്കാരിന് കൈമാറണമെന്ന് ബി.ജെ.പി. സംസ്ഥാന ജനറൽ സെക്രട്ടറി അനൂപ് ആന്റണി ആവശ്യപ്പെട്ടു. ശബരിമലയുടെ കാര്യത്തിൽ മുൻ എൽ.ഡി.എഫ്. സർക്കാരിനെക്കാൾ അനാസ്ഥയാണ് യു.ഡി.എഫ്. സർക്കാരിന്റെ ഭാഗത്തുനിന്നുണ്ടാകുന്നതെന്നും അദ്ദേഹം ആരോപിച്ചു.
ദേവസ്വം മന്ത്രിയും തിരുവിതാംകൂർ ദേവസ്വം ബോർഡ് പ്രസിഡന്റും തമ്മിലുള്ള അഭിപ്രായവ്യത്യാസമാണ് അരവണ ക്ഷാമം ഉൾപ്പെടെയുള്ള വിഷയങ്ങൾക്ക് പിന്നിലെന്നും അദ്ദേഹം ആരോപിച്ചു. എന്നാൽ ബോർഡ് പ്രസിഡന്റ് കെ. ജയകുമാർ സർക്കാരും ബോർഡും തമ്മിൽ തർക്കമില്ലെന്നും പ്രതീക്ഷിച്ചതിലധികം തീർഥാടകർ എത്തിയതാണ് അരവണ ക്ഷാമത്തിന് കാരണമെന്നും വ്യക്തമാക്കിയിട്ടുണ്ട്.
അരവണ പ്ലാന്റ് നവീകരണത്തിനായി അടച്ചതിനു മുമ്പ് ആവശ്യമായ കരുതൽശേഖരം ഉറപ്പാക്കേണ്ടിയിരുന്നുവെന്നും അനൂപ് ആന്റണി പറഞ്ഞു. പ്ലാന്റ് നവീകരണത്തെ തുടർന്ന് അരവണ ലഭ്യതയിൽ പ്രതിസന്ധിയുണ്ടായതായി റിപ്പോർട്ടുകളുമുണ്ട്.
ശബരിമലയുടെ അടിസ്ഥാന സൗകര്യ വികസനവും തീർഥാടന സൗകര്യ വർധനയും സംബന്ധിച്ച് സർക്കാർ നൽകിയ വാഗ്ദാനങ്ങൾ നടപ്പായില്ലെന്നും അദ്ദേഹം ആരോപിച്ചു. ശബരിമല റെയിൽ പദ്ധതിയിൽ കേന്ദ്രം ആവശ്യമായ നടപടികൾ സ്വീകരിക്കാൻ തയ്യാറാണെന്നും സംസ്ഥാന സർക്കാരുകളുടെ താൽപര്യക്കുറവാണ് പദ്ധതി വൈകാൻ കാരണമെന്നും അനൂപ് ആന്റണി ആരോപിച്ചു. വിഷയങ്ങൾ സംബന്ധിച്ച് ബി.ജെ.പി. സംഘം ശബരിമല സന്ദർശിച്ച് കേന്ദ്രത്തെ ധരിപ്പിക്കുമെന്നും അദ്ദേഹം അറിയിച്ചു.
