കൊണാട്ട് പ്ലേസിൽ സമരവുമായി എസ്എഫ്ഐ; ഗ്യാനേഷ് കുമാറിന്റെ രാജി ആവശ്യപ്പെട്ട് മുദ്രാവാക്യങ്ങൾ
ന്യൂഡൽഹി: പൊലീസ് നിയന്ത്രണങ്ങളും വ്യാപകമായ കസ്റ്റഡിയിലെടുക്കലുകളും മറികടന്ന് ഡൽഹിയിൽ പ്രതിഷേധം തുടരുകയാണ് വിദ്യാർഥി സംഘടനകൾ. ദേശീയ പതാകയേന്തി തെരുവിലിറങ്ങിയ എസ്എഫ്ഐ പ്രവർത്തകർ ഞായറാഴ്ചയും കൊണാട്ട് പ്ലേസിലെ ഇൻറർ സർക്കിളിൽ പ്രതിഷേധം നടത്തി. പ്രതിഷേധക്കാർക്കു നേരെ പൊലീസ് നടപടിയുണ്ടായെങ്കിലും സമരത്തിൽനിന്ന് പിന്മാറാൻ തയ്യാറാകാതെയാണ് പ്രവർത്തകർ രംഗത്തിറങ്ങിയത്.
മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടും വോട്ടർപട്ടികയിലെ പ്രത്യേക തീവ്ര പരിഷ്കരണമായ എസ്‌ഐആറിനെതിരെയുമാണ് പ്രതിഷേധം. ജന്തർ മന്തറിൽ പ്രതിഷേധം സംഘടിപ്പിക്കാനുള്ള നീക്കത്തിന് പൊലീസ് നിയന്ത്രണങ്ങൾ ഏർപ്പെടുത്തിയതോടെയാണ് കൊണാട്ട് പ്ലേസ് ഉൾപ്പെടെയുള്ള കേന്ദ്രങ്ങളിൽ പ്രതിഷേധം വ്യാപിച്ചത്.
എസ്എഫ്ഐ, എഐഎസ്എഫ് തുടങ്ങിയ ഇടതുപക്ഷ വിദ്യാർഥി സംഘടനകളുടെ പ്രവർത്തകർ പ്രതിഷേധത്തിൽ പങ്കെടുത്തു. എസ്എഫ്ഐ നേതാക്കളും പ്രവർത്തകരും ഉൾപ്പെടെയുള്ളവരെ പൊലീസ് കസ്റ്റഡിയിലെടുത്തതായും റിപ്പോർട്ടുകളുണ്ട്. എസ്എഫ്ഐ ദേശീയ ജോയിന്റ് സെക്രട്ടറി ഐഷേ ഘോഷ് ഉൾപ്പെടെയുള്ള നേതാക്കൾ സമരത്തിന്റെ ഭാഗമായിട്ടുണ്ട്.
നഗരത്തിലെ പ്രധാന കേന്ദ്രങ്ങളിൽ കനത്ത സുരക്ഷ ഏർപ്പെടുത്തുകയും പ്രതിഷേധക്കാരെ തടയുകയും ചെയ്തിട്ടും തെരുവിലിറങ്ങി പ്രതിഷേധം തുടരുകയാണ് വിദ്യാർഥി സംഘടനകൾ. തലസ്ഥാന നഗരിയിൽ പൊലീസ് നിയന്ത്രണങ്ങൾ ശക്തമായ സാഹചര്യത്തിലും ദേശീയ പതാകയേന്തിയുള്ള പ്രതിഷേധം ശ്രദ്ധേയമായി.
വോട്ടർപട്ടികാ പരിഷ്കരണവുമായി ബന്ധപ്പെട്ട ആശങ്കകൾ ഉയർത്തിയാണ് പ്രതിഷേധക്കാർ തിരഞ്ഞെടുപ്പ് കമ്മിഷനെതിരെ രംഗത്തെത്തിയിരിക്കുന്നത്. പ്രതിഷേധം രണ്ടാം ദിവസവും തുടരുന്ന സാഹചര്യത്തിൽ ഡൽഹിയിലെ വിവിധ ഭാഗങ്ങളിൽ സുരക്ഷ ശക്തമാക്കിയിട്ടുണ്ട്.
