By: ഷിബു കൂട്ടുംവാതുക്കൾ
തിരുവനന്തപുരം: കെപിസിസി യോഗത്തിലേക്ക് കേരളത്തിന്റെ ചുമതലയുള്ള എഐസിസി ജനറൽ സെക്രട്ടറി ദീപാ ദാസ് മുൻഷിക്ക ക്ഷണമില്ലാത്തത് കോൺഗ്രസ് നേതൃത്വത്തിൽ പുതിയ വിവാദത്തിന് വഴിവെച്ചു. സംസ്ഥാന കോൺഗ്രസിന്റെ നിർണായക യോഗത്തിലേക്ക് കേരളത്തിന്റെ ചുമതലയുള്ള എഐസിസി ജനറൽ സെക്രട്ടറിയെ ഒഴിവാക്കുന്നത് ഇതാദ്യമായാണ്. സംഭവത്തിൽ ദീപാ ദാസ് മുൻഷി സംസ്ഥാന നേതൃത്വത്തോട് അതൃപ്തി അറിയിച്ചതായാണ് സൂചന.
കഴിഞ്ഞ രാഷ്ട്രീയകാര്യ സമിതി യോഗത്തിലാണ് കെപിസിസി യോഗം ചേരാൻ തീരുമാനിച്ചത്. എന്നാൽ യോഗത്തിൽ പങ്കെടുക്കുന്നതിനുള്ള അറിയിപ്പ് ദീപാ ദാസ് മുൻഷിക്ക് ലഭിച്ചില്ലെന്നാണ് വിവരം.
പിഎം ശ്രീ പദ്ധതി കേരളത്തിൽ നടപ്പാക്കുന്നതുമായി ബന്ധപ്പെട്ട് രാഷ്ട്രീയകാര്യ സമിതി യോഗത്തിലുണ്ടായ അഭിപ്രായ വ്യത്യാസമാണ് പുതിയ സംഭവവികാസങ്ങളുടെ പശ്ചാത്തലമെന്നാണ് സൂചന. പദ്ധതി സംബന്ധിച്ച് പാർടിയിൽ ആവശ്യമായ ചർച്ച നടന്നിട്ടില്ലെന്ന് ദീപാ ദാസ് മുൻഷി യോഗത്തിൽ വ്യക്തമാക്കിയിരുന്നു.
പിഎം ശ്രീ പദ്ധതിയിൽനിന്ന് പിന്മാറാൻ കഴിയില്ലെന്നും കേന്ദ്ര ഫണ്ട് ലഭിക്കുന്നതിന് പദ്ധതി നടപ്പാക്കേണ്ടത് അനിവാര്യമാണെന്നുമായിരുന്നു മുഖ്യമന്ത്രി വി.ഡി. സതീശന്റെ നിലപാട്. എന്നാൽ പദ്ധതി സംബന്ധിച്ച് പാർടിയിൽ ചർച്ച നടന്നിട്ടില്ലെന്ന നിലപാട് ദീപാ ദാസ് മുൻഷി ആവർത്തിച്ചു.
പദ്ധതി നടപ്പാക്കരുതെന്ന് രാഷ്ട്രീയകാര്യ സമിതി അംഗം ജോൺസൺ എബ്രഹാമും നിലപാട് വ്യക്തമാക്കിയിരുന്നു. ഇതിന് പിന്നാലെയാണ് ദീപാ ദാസ് മുൻഷിയും എതിർപ്പ് രേഖപ്പെടുത്തിയത്.
ഇതിനിടെ കോൺഗ്രസ് പാർടിയും യുഡിഎഫ് സർക്കാരും തമ്മിൽ വേണ്ടത്ര ഏകോപനമില്ലെന്ന വിമർശനവും ദീപാ ദാസ് മുൻഷി ഉന്നയിച്ചു. സർക്കാരിന്റെ പല തീരുമാനങ്ങളും പാർടി നേതൃത്വത്തെ അറിയുന്നില്ലെന്നായിരുന്നു വിമർശനം. കെപിസിസിക്ക് മുഴുവൻ സമയ പ്രസിഡന്റില്ലാത്ത സാഹചര്യം പാർടിയും സർക്കാരും തമ്മിലുള്ള ഏകോപനത്തെ ബാധിക്കുന്നതായും യോഗത്തിൽ നേതാക്കൾ ചൂണ്ടിക്കാട്ടിയിരുന്നു.
പാർടി നേതൃത്വവും സർക്കാരും തമ്മിലുള്ള ആശയവിനിമയത്തിലെ വീഴ്ചകൾ ചർച്ചയായിരിക്കെയാണ് കേരളത്തിന്റെ ചുമതലയുള്ള എഐസിസി ജനറൽ സെക്രട്ടറിയെ തന്നെ കെപിസിസി യോഗത്തിൽനിന്ന് ഒഴിവാക്കിയിരിക്കുന്നത്. സംഭവം കോൺഗ്രസിനുള്ളിലെ അസ്വാരസ്യങ്ങൾ കൂടുതൽ ശക്തമാക്കുമോയെന്നതാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.
