കണ്ണൂർ: കോൺഗ്രസിനുള്ളിലെ വ്യാജ കത്ത് വിവാദത്തിൽ കെപിസിസി പ്രസിഡന്റ് കെ. സുധാകരന്റെ അനന്തരവൻ അജിത് കുമാർ വിശദീകരണവുമായി രംഗത്തെത്തി. വ്യാജ കത്താണെന്ന് അറിയാതെയാണ് താൻ അത് ഫോർവേഡ് ചെയ്തതെന്നും സുധാകരനെ അപകീർത്തിപ്പെടുത്താനാണ് തനിക്കെതിരെ വാർത്തകൾ പ്രചരിപ്പിക്കുന്നതെന്നും അജിത് കുമാർ വ്യക്തമാക്കി. ‘കെഎസ് ബ്രിഗേഡ്’ എന്ന വാട്സ്ആപ്പ് ഗ്രൂപ്പിലൂടെയാണ് അദ്ദേഹം തന്റെ ഭാഗം വിശദീകരിച്ചത്. കേസുമായി ബന്ധപ്പെട്ട് സൈബർ പോലീസ് കഴിഞ്ഞ ദിവസം അജിത് കുമാറിനെ ചോദ്യം ചെയ്തിരുന്നു.
കെപിസിസി മുൻ പ്രസിഡന്റ് സണ്ണി ജോസഫിന്റെ പേരിൽ എഐസിസിക്ക് അയച്ചു എന്ന രീതിയിലാണ് കത്ത് പ്രചരിച്ചിരുന്നത്. കണ്ണൂർ ലോക്സഭാ മണ്ഡലത്തിൽ കെ. സുധാകരനെ മത്സരിപ്പിച്ചാൽ ജയസാധ്യത കുറവാണെന്നും, പകരം ടി.ഒ. മോഹനനെ പരിഗണിക്കണമെന്നുമാണ് കത്തിൽ ഉണ്ടായിരുന്നത്. സുധാകരൻ അനുകൂലികൾക്കിടയിൽ സണ്ണി ജോസഫിനെതിരെ വികാരം ഉണ്ടാക്കുക എന്നതായിരുന്നു കത്തിന് പിന്നിലെ ലക്ഷ്യമെന്ന് കരുതപ്പെടുന്നു. എന്നാൽ കത്ത് വ്യാജമാണെന്ന് സണ്ണി ജോസഫ് അന്നുതന്നെ വ്യക്തമാക്കിയിരുന്നു.
സണ്ണി ജോസഫിന്റെ പരാതിയിൽ സൈബർ പോലീസ് കേസെടുക്കുകയും പാർട്ടിയിൽ നിന്ന് പുറത്താക്കപ്പെട്ട അബ്ദുൾ ഖാദർ, കെ.ജെ. ജോസഫ് എന്നിവരെ പ്രതികളാക്കുകയും ചെയ്തിരുന്നു. ചോദ്യം ചെയ്യലിൽ, ഈ കത്ത് തങ്ങൾക്ക് വാട്സ്ആപ്പിലൂടെ അയച്ചുതന്നത് അജിത് കുമാറാണെന്ന് പ്രതികൾ മൊഴി നൽകി. ഇതിന്റെ അടിസ്ഥാനത്തിലാണ് പോലീസ് അജിത് കുമാറിലേക്ക് അന്വേഷണം വ്യാപിപ്പിച്ചത്. ഗ്രൂപ്പിൽ വന്ന കത്ത് മറ്റുള്ളവർക്ക് അയച്ചു കൊടുക്കുക മാത്രമാണ് താൻ ചെയ്തതെന്നാണ് അജിത് കുമാറിന്റെ വാദം. സംഭവത്തിൽ കൂടുതൽ വ്യക്തത വരുത്താൻ ഡിജിറ്റൽ തെളിവുകൾ ഉൾപ്പെടെയുള്ളവ പോലീസ് പരിശോധിച്ചു വരികയാണ്.
