ന്യൂഡൽഹി: ശബരിമല യുവതി പ്രവേശനവുമായി ബന്ധപ്പെട്ട കേസിൽ ഹർജിക്കാരായ യങ് ലോയേഴ്സ് അസോസിയേഷനെതിരെ കടുത്ത ഭാഷയിൽ വിമർശനമുന്നയിച്ച് സുപ്രീംകോടതി. വിശ്വാസപരമായ കാര്യങ്ങളിൽ ഇടപെടാൻ നിങ്ങൾ ആരാണെന്നും സംഘടനയുടെ താൽപ്പര്യം എന്താണെന്നും ജസ്റ്റിസ് ബി.വി. നാഗരത്ന ചോദിച്ചു. “നിങ്ങൾക്ക് എന്താണ് ശബരിമലയിൽ കാര്യം? നിങ്ങൾ രാജ്യത്തിന്റെ മുഖ്യമന്ത്രിയാണോ?” എന്ന് ചീഫ് ജസ്റ്റിസ് സൂര്യകാന്ത് അഭിഭാഷകനോട് ആരാഞ്ഞു.
യുവ അഭിഭാഷകരുടെ ക്ഷേമത്തിനായി പ്രവർത്തിക്കാൻ സംഘടനയോട് നിർദ്ദേശിച്ച കോടതി, നിയമത്തെ ദുരുപയോഗം ചെയ്യുകയാണ് അസോസിയേഷൻ ചെയ്യുന്നതെന്ന് പരിഹസിച്ചു. സംഘടനയുടെ പ്രസിഡന്റ് ആരാണെന്ന കോടതിയുടെ ചോദ്യത്തിന് നൗഷാദ് അലി എന്ന വ്യക്തിയാണെന്ന് അഭിഭാഷകൻ മറുപടി നൽകി. ഇത്തരം പൊതുതാൽപ്പര്യ ഹർജികൾ വിനാശകരമായ പ്രത്യാഘാതങ്ങൾ ഉണ്ടാക്കുമെന്നും കോടതി മുന്നറിയിപ്പ് നൽകി.
വിശ്വാസികളെക്കുറിച്ചുള്ള കോടതിയുടെ നിരീക്ഷണം
കഴിഞ്ഞ ദിവസത്തെ വാദത്തിനിടെ, യുവതി പ്രവേശന വിധിക്ക് പിന്നാലെ ശബരിമലയിൽ പ്രവേശിച്ച സ്ത്രീകൾ യഥാർത്ഥ വിശ്വാസികളായിരുന്നോ എന്ന ചോദ്യം ജസ്റ്റിസ് നാഗരത്ന ഉയർത്തിയിരുന്നു. മുതിർന്ന അഭിഭാഷക ഇന്ദിര ജയ്സിങ് യുവതി പ്രവേശനത്തെ അനുകൂലിച്ച് വാദിക്കുന്നതിനിടെയായിരുന്നു ഈ പരാമർശം. നൂറ്റാണ്ടുകൾ പഴക്കമുള്ള ആചാരങ്ങളിൽ വീണ്ടും പരിശോധന നടത്തേണ്ട ആവശ്യമില്ലെന്നും കോടതി നിരീക്ഷിച്ചു.
എന്നാൽ, ശബരിമല വിഷയത്തിൽ നിയമത്തെ അനുസരിച്ചവരാണ് പരാജയപ്പെട്ടതെന്ന് ഇന്ദിര ജയ്സിങ് കോടതിയിൽ വാദിച്ചു. ആചാരങ്ങളും ലിംഗസമത്വവും തമ്മിലുള്ള നിയമപോരാട്ടം സുപ്രീംകോടതിയിൽ തുടരുകയാണ്.
